मुळशीत रिंग रोड कामादरम्यान भीषण अपघात; डंपर घरावर पलटून दोन महिलांचा मृत्यू

पुणे ग्रामीण दि.१८ :-  मुळशी तालुक्यात सुरू असलेल्या प्रस्तावित रिंग रोडच्या कामादरम्यान आज एक अत्यंत भीषण दुर्घटना घडली. रस्त्याच्या भरावाचे काम सुरू असताना एका डंपरवरील चालकाचा ताबा सुटला आणि तो थेट रस्त्यालगत असलेल्या घरावर पलटला. या दुर्घटनेत घरात उपस्थित असलेल्या दोन महिलांचा दुर्दैवी मृत्यू झाला.
अपघातानंतर परिसरात मोठी खळबळ उडाली. स्थानिक नागरिकांनी तत्काळ धाव घेत बचावकार्य सुरू केले. पोलिस, अग्निशमन दल व प्रशासनाचे पथक घटनास्थळी दाखल झाले असून ढिगाऱ्याखाली अडकलेल्यांना बाहेर काढण्याचे काम करण्यात आले.
प्राथमिक माहितीनुसार, रिंग रोडचे काम सुरू असताना सुरक्षा नियमांचे पालन न होणे तसेच जड वाहनांची बेफिकीर हालचाल हे अपघातामागील संभाव्य कारण मानले जात आहे. मात्र, नेमके कारण समजण्यासाठी अधिकृत चौकशी सुरू करण्यात आली आहे.
घटनास्थळी स्थानिक प्रतिनिधी उपस्थित असून परिस्थितीवर लक्ष ठेवण्यात येत आहे. या घटनेनंतर मृतांच्या नातेवाइकांना तातडीची मदत व नुकसानभरपाई देण्याची मागणी नागरिकांकडून होत आहे.